Raadsheer Emil Scheepers, Raadsdame Marie Ferreira (Uitvoerende Burgemeester), Dr Michele Gratz (Munisipale Bestuurder),
Me Estelle Burger (Omgewingsbeampte), Mnr Piet van Zyl (Departementshoof van Plaaslike Regering,
Omgewingsake en Ontwikkelingsbeplanning van die Wes-Kaapse Regering) en Raadsheer Jim van der Merwe by die funksie in
Stellenbosch waar Mosselbaai aangewys is Groenste Munisipaliteit vir 2013 in die Wes-Kaap.

Mosselbaai is Dinsdagaand (19 November 2013) as die wenner van die Wes-Kaapse Groenste Munisipaliteit vir 2013 aangewys, en het in die proses prysgeld van R120 000 losgeslaan. Mosselbaai sal nou ook die Wes-Kaap in die 2013 Nasionale Groenste Munisipaliteit-kompetisie verteenwoordig.

Die aankondiging is gedoen by ‘n onthaal wat gisteraand in Stellenbosch gehou is. Sewentien van die 24 plaaslike munisipaliteite in die Wes-Kaap het vir dié jaarlikse kompetisie ingeskryf.  Drakenstein was tweede, en Swartland en Overstrand het die derde pryse gedeel.

Mosselbaai het ook drie van ses kategorieë van die kompetisie, naamlik vir lugbesoedeling; energiedoeltreffendheid- en bewaring en vir leierskap, voldoening, institusionele reëlings en publieke deelname gewen. Die Munisipaliteit het ook die toekenning vir innoverende projekte vir sy biodrupsypelprojek in Voorbaai ontvang.

“Ons is uiteraard verheug oor die toekenning want dit het harde werk en sorgvuldige bestuur van ons aksies en projekte geverg. Behalwe die feit dat ‘n gesonde omgewing in die belang van al ons inwoners is, is Mosselbaai ook ‘n toerismebestemming wat baie belangrik vir die plaaslike ekonomie is. Dit is dus noodsaaklik dat ons aandag gee aan aspekte wat Mosselbaai so aantreklik en aanloklik as moontlik vir toeriste maak, en hierdie toekenning toon die Munisipaliteit se erns met die saak,” het die Uitvoerende
Burgemeester, Raadsdame Marie Ferreira gesê.

Mosselbaai het verlede jaar die tweede plek in die kompetisie behaal. Die Munisipale Bestuurder, dr Michele Gratz, het gesê die prysgeld sal, soos verlede jaar weer, teruggeploeg word in projekte om Mosselbaai se status as die Groenste Munisipaliteit in die Wes-Kaap te handhaaf.
Die kompetisie het vroeër jare bekend gestaan as

die Skoonste Dorp-kompetisie, maar is sedertdien uitgebrei tot ‘n baie meer omvattende kompetisie wat onder meer faktore soos afvalbestuur, kusbestuur, luggehaltebeheer en waterbestuur insluit.•

Mosselbaai is besig om sy vere reg te skud vir nog ‘n Diasfees, en die reëlings vir die volgende fees van 30 Januarie 2014 tot 2 Februarie 2014 is reeds ver gevorderd.

Soos die met die vorige twee feeste, sal toegang gratis wees om dit vir soveel as moontlik mense moontlik te maak om die fees by te woon.

Lugvertonings, wat in 2012 en 2013 sulke hoogtepunte was, sal weer deel vorm van die 2014-fees, terwyl ‘n vuurwerkvertoning ook beplan word. Die SA Polisiediens sal aan die fees deelneem, terwyl die Indonesiese Konsulaat-Generaal in Kaapstad ook weer hul deelname in die gees van die feestema van “Waar Kulture Ontmoet” bevestig het.
Onderhandelinge met van Suid-Afrika se bekendste musikante, onder andere Idols-wenners Elvis Blue, Heinz Winckler en Sasha-Lee, en finaliste soos Lloyd Cele, Crushanda Forbes en Gift Gwe, om by die fees op te tree, is feitlik voltooi. Nog bekendes met wie onderhandel word, is Emo Adams, Ray Dylan, Monique, Sarah Theron, Gerrie Pretorius en Wicus van der Merwe.
Die SA Polisiediens se berede-afdeling sal ook weer vanjaar teenwoordig wees, terwyl vertonings by die feesterrein asook statiese uitstallings aangebied sal word. Die SA Polisie-orkes sal op Saterdagaand, 1 Februarie 2014, saam met verskeie gemeenskapsblaasorkeste in die Harry Giddeypark optree.

Die program sluit weer ‘n motorsportgimkana, ‘n straatparade en rubberbootwedrenne in.  Daar sal ‘n biertent wees, en moontlik ook ‘n uitstalling van veteraanmotors en trekkers. Sowat 100 stalletjiehouers word weer by die fees verwag.
Die fees word deur die Mosselbaaise Munisipaliteit gekoördineer, en aangebied om die dorp te bemark en die plaaslike ekonomie te help stimuleer gedurende die stiller tye van die jaar. Die volledige program sal binnekort bekendgemaak word, en ook op die feeswebblad, www.mosselbayevents.co.za bekendgemaak word. •

Die hersiene verordening insake buitereklame en advertesietekens van die Mosselbaaise Munisipaliteit is op 8 November 2013 in die Wes-Kaapse Provinsiale Koerant afgekondig, en is nou van krag. Die verordening reguleer onder meer naamborde op sakegeboue, eiendomsagentkapsborde, lamppaaladvertensies en losstaande buitelugadvertensieborde.

Die oorspronklik verordening het in Januarie 2010 in werking getree, maar is intussen hersien en uitgebrei.

Daar is verskeie nuwe toegewings en wysigings gemaak ten opsigte van tekens waarvoor die Munisipaliteit se toestemming nie nodig is nie. Dit sluit in ‘n maksimum van twee Te Koop- of Te Huur-tekens, en een Verkoopteken wat voortaan binne die grense van residensiële eiendomme geplaas kan word. Dit sluit eiendomsagentskapsborde in. Dié borde mag nie groter as 0,3 vierkante meter wees nie, of meer as ‘n meter hoog wees nie.

Skoutekens en rigtingwysers by huise mag nou ook vertoon word gedurende nasionale skoolvakansies vanaf 12:00 voor die eerste skoudag. Dit moet teen nie later nie as 20:00 op  die laaste skoudag verwyder word.  Skoutekens mag nie vir langer as sewe aaneenlopende dae per skouhuis vertoon word nie.

Elke skouteken of rigtingaanwyser moet ‘n plakker van die Munisipaliteit vertoon, wat die wettigheid en geldigheidsduur van die skouteken of rigtingaanwyser aandui.

Die maksimum-hoeveelheid sekuriteitstekens is tot twee verhoog, terwyl munisipale toestemming nie verkry hoef te word vir nasionale vlae, veerbaniere, reklameborde in arkades, of tekens wat deel van ‘n optog is nie.

Die maksimum-grootte van vrygestelde besigheidstekens is verhoog van 0,2 vierkante na 0,5 vierkante meter. ‘n Grasietydperk van ses maande vanaf die datum van afkondiging van die verordening sal geld vir goedkeuring van alle besigheidstekens wat die perk oorskry. Sake-ondernemings moet dus ook aansoek by die Munisipaliteit doen vir goedkeuring van tekens wat groter as 0,5 vierkante meter is.

Die gewysigde verordening maak voorsiening vir ‘n groot aantal nuwe tekens wat in ooreenstemming is met die Suid-Afrikaanse Handboek van Buitelugreklamebeheer, en wat destyds in opdrag van die Direktoraat van Omgewingsimpakbestuur van die Departement van Omgewingsake saamgestel is.

Die verordening is op die Munisipaliteit se webwerf by www.mosselbay.gov.za beskikbaar.
Navrae kan aan Francis Brand by telefoon (044) 606-5078 of per e-pos aan fbrand@mosselbay.gov.za gerig word.•

The National Youth Development Agency, in collaboration with the Youth and Local Economic Development Offices of the Mossel Bay Municipality, will host a job preparedness workshop and business awareness training programme from 5 to 6 December 2013.

Young people between the ages of 18 and 35 years are invited to attend these capacity building workshops.

Application forms can be obtained from the municipal offices, libraries, LED Office in the Goods Shed,  the Municipality’s Youth Office at the Indoor Sports Centre in Samson Street,  Extension 23 (next to the Roman Catholic Church) as well as from the community development workers.

Written applications must be accompanied by a CV and certified copy of the applicant’s identity document.

Completed application forms can be submitted to the community development workers or at the LED office at the Goods Shed or at the Youth Office by not later than 10:00 on 29 November 2013.

Enquiries can be addressed to Yolande van Aswegen at (044) 606-5224 or 0822966199 or Sharion Louw at (044) 606-5250 or 0826653533. •