Na aanleiding van ‘n paar kleiner onsuksesvolle besighede in Mosselbaai wat hulle deure onlangs moes sluit, het ek baie bekommerd begin soek na redes en oplossings.
Na alles is ek ook die eienaar van ‘n klein besigheid en ervaar ek ook soms…nee, gereeld, die druk wat daarmee saamgaan. Maar ek kan nie, mag nie, wil nie ook daar eindig nie.
Wat is die oplossing dan en wat bepaal sukses ?
In my soeke vir antwoorde kom ek toe tot die volgende gevolgtrekking …
Maak nie saak uit watter omgewing jy kom, wat jou sosiale intelligensie is, of jy mooi en gesond is, en of jy ‘n hoë IK het nie.
Vasbyt….dis wat nodig is vir sukses …vasbyt !!
Vasbyt beteken passie en deursettingsvermoë met langtermyn doelstellings. Dit is om stamina, en moed van jou oortuigings te hê, en om te onthou wat jou idée vir die toekoms is, dag ná dag. Om regtig hard te werk om daardie toekoms ‘n werklikheid te maak.
Nie net ‘n week of ‘n maand lank nie, maar jare aaneen. (Inteendeel daar word gereeld verwys na 1000 dae voordat jy werklik die vrugte begin pluk.)
“Vasbyt is om die lewe te leef asof dit ‘n marathon is, nie ‘n naelloop nie”.