Vasbyt – Hoekom voel ek nie lus om te leer nie?

Jy weet moontlik al teen hierdie tyd watter Beroepsrigting jy oorweeg. Indien jy in Matriek/Graad 12 is, het julle seker al begin met hersiening vir die eindseksamen. Jou uitslae kan bepaal in watter mate jy jou Beroepsrigting gaan bereik. So vir jou kan ek net së Sterkte en Vasbyt!
Die reeks “Dream School” het so pas klaargemaak op SABC 2 en ons het almal gesien daar was verskeie redes waarom hierdie leerders kanse verspeel het, maar gelukkig kon hulle weer ‘n kans kry. Nie een van hierdie leerders was “dom” of akademies nie instaat om matiek te haal nie, maar hulle het skool verlaat oor allerhande probleme soos:
a) Ek haat skool; b) Ek hou nie van die onderwysers nie; c) Onderwysers is almal “simpel”; d) Ek het swanger geraak en nie weer terug gegaan nie; e) Ek het verkeerde maats gehad en saam met hulle skool gemis om verkeerde dinge te doen (My vraag wanneer is hulle die verkeerde maats, kan dit dalk wees dat jy die verkeerde vriend vir hulle is, of dat julle nie goed is vir mekaar nie omdat julle negatiewe gedrag by mekaar verhoog en sodonde verkeerde invloede op mekaar het); f) ek stel meer belang in sport (wat doen jy as jy nie meer sport kan doen nie en jy het nie ‘n goeie basis gebou nie); g) My ouers het so baie baklei en ek wou net uit die huis uit wegkom en nog vele meer.

Soos die program gevorder het, het dit al hoe duideliker geword dat daar baie meer is wat ‘n rol speel, maar die grootste probleem was die leerders se HOUDING (ATTITUDE).

Indien jy nie iets positiefs wil vind nie, gaan jy bly verskonings soek en geen vordering maak in jou skoolwerk of in jou loopbaan (werk) eendag nie. Jy sal altyd ‘n verskoning kry waarom jy nie suksesvol is nie, en dit sal altyd (volgens jou) of die onderysers, maats of jou baas se skuld wees. My eerste vraag aan jou is; Is daar iets wat jy kan verander om akademies beter te doen. Net soos jy nie nou vir jou onderwysers se beswil jou studiewerk doen nie, maar vir jouself (jy is die een wat matriek moet slaag, die ondrwysers het dit klaar vermag), gaan jy eendag vir jouself ‘n werk verrig. Besluit om vandag in jouself te glo en iets positiefs uit elke klas saam te neem huistoe en jy gaan verras wees hoe jy geleidelik in jou werk verbeter.
Vir leerders van Graad 11 en laer is dit nog nie te laat om daaraan te werk om julle punte te verbeter nie. Vanaf graad 10 raak dit krities belangrik dat jy nie net op jou geheue staatmaak nie, maar al jou vakke moet verstaan sodat jy die werk op ander probleme in di edaaglikse lewe kan toepas. Menige leerders het al hul vingers verbrand omdat hulle nie gestudeer het en tyd aan hulle akademie bestee het toe dit nodig was nie. Jy het nog tyd om daaraan aandag te gee, om aan jou eie houding te werk en uit te vind WAT jy kan verbeter en HOE jy dit kan verbeter.
Waarom presteer ons nie so goed soos ons behoort te doen nie, daar kan verskeie redes wees:
a) Ek het nie ‘n studietegniek wat ek toepas nie. Selfs Wiskunde moet geleer word – dink net al die reëls wat mens moet toepas in Wiskunde). Gaan na jou LO Opvoeder hulle kan jou help of besoek ander persone wat Studie vaardigheidsklasse aanbied.
b) Ek beplan nie goed genoeg nie en het hulp nodig om my tyd beter te beplan.
c) Ek het ‘n baie vol buitemuurse program en kom nie by my akademiese werk uit nie.
d) Ek vermors tyd op allerhande nietighede soos bv. ‘n TV rogram wat ek net MOET sien
As jou probleem b);c); en of d) is, moet jy beter beplan en vir jouself ‘n tydraamwerk opstel wat jy kan volg. Baie volwassenes doen deesdae ekstra kursusse om te leer hoe om hulle tyd beter te beplan of bestuur.
e) Ek stel uit want ek dink nie ek is in staat om die werk te doen nie. Kry ekstra hulp by iemand wat uitstekend met die vak is en kyk of jy nie jou punte in daardie vak kan verbeter nie. Niemand verwag 100% van jou nie, maar elke 5% wat jy beter doen in ‘n vak is ‘n verbetering in die regte rigting.
f) ‘n Groot verskoning baie keer is my ouers glo ek kan dit nie doen nie. Dit kan wees omdat jou ouers baie keer jou werk uit jou hande neem en die werk vir jou doen (skoolwerk of take by die huis), terwyl hulle sê “gee ek doen dit gou vir jou dan kan jy jou boek lees (of watter rede ookal), op die manier kry jy die boodskap dat jou ouers dink jy is nie instaat om dit self te doen nie. Wat gaan jy hieraan doen? Of iets soos ‘n ouer wat sê “ek was nooit goed in Wiskunde nie, daarom sal jy ook sukkel”, dit mag dalk wees dat iemand anders in jou groter familie beter daarmee was en jy eintlik daardie “Wiskunde” gene van daardie persoon geëerf het, nou kruip julle agter daardie verskoning weg en so benadeel jy jouself.
g) Ek weet nie wat ek moet doen nie, want die kinders lawaai te veel in die klas. Gaan vra die onderwyser na klas wat hy/sy verwag.
h) Ek wil nie die huiswerk doen nie, soms die verskoning as ek onseker is oor hoe om dit te doen. Ek het self na baie trane uitgevind dat as ek eers self probeer en bietjie terug gaan na die vorige werk en alles stap-vir-stap vir myself verduidelik, begin ek die werk regkry en soms selfs geniet. Glo in jouself.
i) Ek gee nie om of die werk gedoen word nie, ek voel nie in die bui om dit te doen nie. Gaan praat asb met jou LO onderwyser of enige ander volwassene wat jy voel jy kan vertrou.
j) Ek werk beter onder druk en stel daarom uit tot op die laaste. Indien ek al my voorbereiding elke week bietjie vir bietjie doen is dit makliker teen die einde wanneer ek net alles moet uitsorteer en bymekaar moet sit.
k) Ek voel nie reg om te begin nie, my gemoed voel nog nie reg vir hierdie stuk werk nie. Gaan sit net op dieselfde plek elke dag dieselfde tyd en haal die boeke uit, begin hier en daar lees in die boeke en na ‘n rukkie sal jy uitvind dat jy meer begeesterd is om meer te weet.

Jy kan hulp kry by die skrywer van hierdie artikel Sien advertensie hierby vir kontakbesonderhede.
Indien julle enige vrae het wat julle voel julle wil hê dat ek hier moet behandel kan julle vir my vrae stuur sodat ek daaroor kan skryf. Indien daar geen vrae is nie sal ons sal met die volgende uitgawe kyk na hoe om te beplan vir jou studies. •

Leave a Reply

Your email address will not be published. Required fields are marked *